Монгол Улсын Үндсэн хуулийн өдрийг угтан Улсын Их Хурлын даргын ивээл дор уламжлал болгон зохион байгуулагддаг Шатар сонирхогчдын улсын аварга шалгаруулах 11 дэх удаагийн тэмцээний шигшээ тоглолт амжилттай зохион байгуулагдаж өндөрлөлөө.
Улсын Их Хурлын Тамгын газар, Монголын шатрын холбоотой хамтран зохион байгуулж буй энэ удаагийн Шатар сонирхогчдын улсын аварга шалгаруулах тэмцээн 2022 оны 11 дүгээр сарын 26-наас эхлэн, нийт 5270 гаруй шатар сонирхогч бүртгүүлснээс шигшээ тоглолтод 138 шатарчин оюун ухаанаараа өрсөлдлөө.
Шатар сонирхогчдын улсын аварга шалгаруулах тэмцээн нь Анхан шатны (сум, дүүрэг), Хагас шигшээ (аймаг, нийслэл), Шигшээ тэмцээн гэсэн гурван үе шаттай зохион байгуулагдлаа.
Тэмцээнд Монголын шатрын холбооны рейтингийн жагсаалтаар сүүлийн 1 жилийн хугацаанд чансаа нь 2000, эмэгтэй шатарчдын хувьд 1800-аас илүүгүй, шатрын спортын цолгүй, зөвхөн насанд хүрсэн шатар сонирхогчид оролцох эрхтэй аж.
Манай аймгаас эрэгтэй төрөлд Цэнгэл сумын А.Есбол, Өлгий сумын Б.Айболат, эмэгтэй төрөлд Өлгий сумын М.Енгилик нар оролцож М.Енгилик маань шагналт байранд шалгарчээ.
Баяр хүргэж илүү их амжилт гаргахыг хүсье.
