Монголчуудын оюуны соёлын салшгүй бүрэлдэхүүн, давтагдашгүй өв болсон монгол бичгийг ард иргэдэд эзэмшүүлэх, хойч үедээ өвлүүлэх орчин нөхцөлийг бий болгож, улмаар бүх нийтийн хэрэглээний бичиг болгох зорилго бүхий “Хос бичигтэн” хөтөлбөрийг Баян-Өлгий аймгийн ИТХ-аас баталсан.
Монгол хэлний тухай хууль, Ерөнхийлөгчийн зарлиг, Хэлний бодлогын үндэсний зөвлөлийн тогтоол, аймгийн Засаг даргын мөрийн хөтөлбөрийг орон нутагт хэрэгжүүлэх бодлого, үйл ажиллагааны чиглэлд туссан “Хос бичигтэн” дэд хөтөлбөрийг 2023-2025 онд хэрэгжүүлэх юм байна.
Хөтөлбөрийн хүрээнд үндэсний бичгийн сургалтын болон хэрэглээний орчныг сайжруулж, хэрэглээг нэмэгдүүлэх, төрийн албан хаагчийн үндэсний бичиг сурах болон хэрэглээний чадварыг сайжруулах, Ерөнхий боловсролын сургуулийн сурагчид, иргэдэд үндэсний бичгийг албан ба албан бус сургалтаар зааж сургах ажлууд өрнөнө.
“Хос бичигтэн” хөтөлбөрийг хэрэгжүүлэх үйл ажиллагааны төлөвлөгөөг зорилгодоо нийцүүлэн хийж, шалгуур үзүүлэлтийн дагуу зардлыг нарийвчлан тооцож жил бүрийн орон нутгийн төсөвт тусган санхүүжүүлэхээс гадна иргэд, төрийн бус байгууллага, аж ахуйн нэгжүүдээс санхүүгийн дэмжлэг нээлттэй байх аж.