ОХУ-аас Дархан-Уул аймагт суугаа Ерөнхий консул А.Ц.Доржиев, Орос Улсын дипломат ажилтны өдрийг тохиолдуулан уламжлал ёсоор сэтгүүлчдийг урьж уулзан Дарханчуудад баярын мэндчилгээ дэвшүүллээ.  

Уулзалтын үеэр ОХУ-аас Дархан-Уул аймагт суугаа Ерөнхий консул А.Ц.Доржиев:

“-Дархан-Уул аймаг дахь ОХУ-ын Ерөнхий Консулын газрын гол үүрэг нь бүс нутаг, хил орчмын Орос Монголын хамтын ажиллагааг хөгжүүлэх явдал юм.

Дархан-Уул, Сэлэнгэ аймаг ба Буриад Улсын харилцаа эрчимтэй хөгжиж буй. Тухайлбал Дархан хотын нэгэн гудамжийг Улан-Үдэ хотын нэрээр нэрлэж, Буриад Улсын нийслэлийн сүлдийг дүрсэлсэн самбар байрлуулсан.

ОХУ-ын Буриад улс Дархан-Уул аймгийн ах дүү найрамдалт харилцаан дээр сууриласан хамтын ажиллагааны хүрээнд олон ажил хийгдсэн бөгөөд үүнийн томоохон ажлуудаас дурьдвал: Зэлтэрийн шалган нэвтрүүлэх боомтын бүтээн байгуулалтын ажил ид өрнөж буй, “Дарханы ДЦС” дээр Оросын “АСЕН” компани 35 мВт хүчин чадалтай шинэ 5-р цахилгаан блок суурилуулж байна, Оросын Ерөнхий Консулын урилгаар ОХУ-ын Гавъяат дасгалжуулагчдын удирдсан байт сурын харвааны мастер ангиллын сургалт Дарханд явагдсан, “Жигүүр” дунд сургуулийн хамт олон Монгол-Оросын найрамдлын нийгэмлэгт элссэн,  ОХУ,  Монгол улсын харилцан визгүй зорчих горимыг сэргээсний дараа “Хиагт-Алтанбулаг” шалган нэвтрүүлэх цэгээр өнгөрөх зорчигчдын тоо 17-20% нэмэгдсэн. Хоногт 1 000 машин хилээр нэвтрүүлэхээр Хиагтын шалган нэвтрүүлэх цэгийг өргөтгөх ажил хийгдэж байна.

Сэлэнгэ, Дархан-Уул аймгийн удирдлага, хоёр улсын цаг үеийн шалгуурыг давсан найрамдалт харилцааг хөгжүүлэхэд анхаарч байгааг өндрөөр үнэлж байна. Сэлэнгэ, Дархан -Уул аймгийн засаг захиргаатай хамтран нийгмийн өргөн хүрээнд олон түмнийг хамарсан баярын үйл ажиллагааг явуулахаар төлөвлөөд байна” хэмээн мэдээллээ.