Дархан-50 цогцолборт “Зөв монгол хүүхэд”  хөтөлбөрийн хүрээнд сурлага, урлаг, спортын амжилт гаргасан 500 хүүхдийн баярын жагсаал болох юм. Энэ үеэр олон улс, улс, бүсийн уралдааны шагнал, авъяаслаг сурагчдын урлагийн тоглолт, 300 хүүхдийн бие биелгээ, тэтгэлэгт хөтөлбөрт шалгарсан сурагчдад батламж болон “Гал тоглоом биш” зургийн уралдааны шагналыг гардуулах ёслол болно. Мөн авьяаслаг сурагчид, зорилтот бүлгийн 1000 хүүхдэд бэлэг гардуулна.

Найрамдал талбайд Дугуйн уралдаан, Үндэсний бөхийн барилдаан, “Гар зургийн уралдаан” зэрэг тэмцээнийг 12-оос доош насны хүүхдүүд дунд зохион байгуулж  шагналт байрыг тодруулна. Харин Миний Монгол цэцэрлэгт хүрээлэнд ААНБайгууллагууд албан хаагчдынхаа хүүхдүүдэд зориулсан үйл ажиллагааг зохион байгуулна. Энд “Би дуучин” дууны уралдаан, үлгэрийн баатруудын тоглолт, хөгжөөнт тоглоом, сугалааг явуулахаас гадна эрүүл ахуй, чанарын шаардлага хангасан хүнсний болон тоглоомын худалдаа явагдана.

Олон Улсын Хүүхдийн Эрхийг Хамгаалах өдөр аймаг, орон нутгийн хэмжээнд дээрх ажлуудыг зохион байгуулахаас гадна зам тээврийн осол гэмтлээс урьдчилан сэргийлэх сэрэмжлүүлэг санамж өгөх, бяцхан үрсдээ хүндэтгэл үзүүлэх үүднээс жолооч нар машины гэрлээ асааж хөдөлгөөнд оролцох зэрэг ажлууд өрнөнө. Иргэд та бүхнийг тус өдрийн үйл ажиллагаанд идэвхитэй оролцохыг уриалж байна.